多倫多主戰奧城大駁火
今季美職雖冇咗「雙特」謝拉特同林柏特，但都有唔少星級猛將獻技，聽朝嘅東岸大戰，ＦＣ多倫多主場對奧蘭多城，ＦＣ多倫多有前祖雲達斯「小巨人」基奧雲高孭飛，而奧蘭多城亦有卡卡助陣。兩位好波之人同樣能傳擅射，可望合演入球騷，中位數2.5球嘅入球大雖然得1.57倍，阿King認為熱食無妨。
（TVB 303周四早上7時30分直播）
基奧雲高卡卡「Goal」手過招
基奧雲高加盟ＦＣ多倫多後，為球隊上陣79次轟入48球，入球率極高，上季更幫球隊打入季後賽總決賽，可惜互射12碼輸畀海灣者。ＦＣ多倫多今季捲土重來，仍然係爭標熱門分子，近兩場主場贏晒，包括以3比1擊敗有舒韋恩史迪加助陣嘅芝加哥火燄，該仗基奧雲高梅開二度搶晒風頭，今場遇上強者卡卡，自然未驚過。
35歲嘅卡卡季初養傷，上仗復出後備上陣30分鐘就有入球，證明寶刀未老。賽後佢受訪時表現激動，話自己仍然渴望比賽，爭勝心從未減過。奧蘭多城今季表現大勇，7場聯賽取得6勝1負排東岸榜首，加上卡卡復出後，更有本錢同對手駁火。
日聯盃柏雷素爾櫻花有計
日聯盃方面，A組柏雷素爾主場對磐田山葉，今季加盟磐田山葉嘅中村俊輔早前受傷無法披甲，加上磐田近4次作客3敗，捧柏雷素爾主勝為妙。B組廣島三箭未衰完，今季6次主場出擊，只有3和3負未贏過，今仗主場對大阪櫻花，寧捧客勝。