今晚雖有法甲「1哥」摩納哥對祖雲達斯嘅歐聯4強大戰，但大家唔好睇漏，今晚亦有1場歐霸4強首回合提前上演，就係另一支法甲勁旅里昂作客阿積士。阿積士於今屆歐霸主場出擊特別sharp醒，撞正近2圈歐霸跌Watt嘅里昂，有力藉地利先拔頭籌，小讓平半必捧上盤。
(now 670及FSP周四凌晨零時45分直播)
阿積士有「球星搖籃」嘅美譽，已故球王告魯夫及雲巴士頓、列卡特、朗奴高文等名將皆出身自「紅白軍團」，但佢哋上次喺歐洲賽封王，要數到1995年勇奪歐聯錦標，並由古華特、戴維斯、施多夫、簡奴、雲達沙等刮起一股青春風暴，之後1季再殺入決賽，可惜互射12碼不敵祖雲達斯飲恨。之後阿積士未嘗再於歐洲賽威過，今屆殺入歐霸4強，更係事隔21年後再闖入歐洲賽準決賽，連古華特個囝囝、依家效力阿積士嘅祖斯甸古華特都快將18歲，既然喺荷甲爭標機會唔樂觀，隨時all in歐霸冠軍威番鋪。
里昂作客例腳軟
阿積士於今屆歐霸主場零舍醒神，由分組賽開始踢咗6仗主場賽事，唔單止全部贏晒，當中有5仗保持冇失波，特別係去到淘汰賽階段，阿積士嘅主場佳績成為晉級關鍵。睇番阿積士對上3圈作客面對歷基亞、哥本哈根及史浩克04只得1和2負，如果唔係主場咁勁，可能已經被踢出局，因此今仗首回合主場出擊，必定搏盡爭勝。另一邊廂，里昂以歐聯小組第3名轉戰歐霸淘汰賽，除咗32強能夠雙殺另一支荷甲代表阿爾克馬爾，對上2圈作客對羅馬及比錫達斯全部輸晒，證明佢哋作客唔多掂檔，加上弗爆借將迪比唔符合參賽資格而缺陣，今仗凶多吉少。