摩納哥受讓筍到雲
青春風暴襲老婦人
今晚歐聯4強首回合，摩納哥主場火併祖雲達斯，屬於活力同經驗對決！以「新亨利」基利安麥巴比為首嘅法甲一哥摩納哥，今屆歐聯刮起一股青春風暴，其中主場一舉擊敗3支名牌勁旅熱刺、曼城、多蒙特，遇強愈強。意甲「老婦人」祖雲達斯防線年齡偏高，遇到集速度同力量於一身嘅摩納哥鋒線，認真危危乎，讓波更加制唔過，寧揀受讓平半嘅摩納哥下盤。
（有線61、64、201及203台周四凌晨2時45分直播）
兩隊曾於2015年歐聯8強交手，當時摩納哥批新血仲未冒起，但主場仍然可以同祖記打和0比0，可惜作客輸0比1出局。相隔2年，摩納哥進步神速，目前喺法甲力壓巴黎聖日耳門，高居榜首，好大機會打破對方聯賽4連冠壟斷局面。最令人驚喜係摩納哥呢班「生牯仔」去到歐聯，都有出色發揮，18歲新星基利安麥巴比7戰入5球，包括16及8強合共4場淘汰賽都有波入。
今季回巢嘅「老虎」法卡奧亦大翻身，喺歐聯都有7球進帳，呢位哥倫比亞國腳衝擊力強，配合基利安麥巴比靈巧、高速，2人可以話係剛柔並濟嘅完美組合，勢必為祖記防線構成重大威脅。摩納哥仲有泰莫爾巴卡約高、湯馬士林馬、貝拿度施華等活力四射「90後」新星，初生之犢不畏虎，包括外圍賽在內，摩納哥於今屆歐聯主場7戰6勝1和，愈踢愈有信心。值得一提，摩納哥上周中法足盃4強對聖日耳門，不惜派出8名青年軍上陣，明顯留力歐聯，爭標決心極高。
祖雲達斯基迪拉停賽
祖雲達斯8強淘汰巴塞隆拿，贏盡口碑，呢支意甲班霸最大優勢，係歐聯經驗比摩納哥豐富，但亦係球隊嘅隱憂。事關祖記一班沙場老將，保方、基亞連尼、丹尼爾等人均年逾30，面對摩納哥快速反襲，以及全場高強度壓迫打法，祖記體力輸蝕。加上防中基迪拉今仗停賽，缺少呢位硬漢喺中場掃蕩，幾位防線老將負擔更大。事實上，祖記上仗意甲作客年輕、快速嘅阿特蘭大，都痛失2分，今仗造訪更加勇猛嘅摩納哥，相當難踢。