西甲頹兵撞正英超「傷魔」
今晚繼續上演歐霸盃4強首回合，由西甲切爾達主場對英超曼聯。「紅魔」曼聯近期變「傷魔」，常規人腳傷兵多達7人，巧婦難為無米之炊，領隊莫連奴手上人腳有限，更加會以最擅長嘅防守踢法應敵，希望作客捱到尾保住唔輸，等次回合返主場再謀贏波。切爾達近4場主場3敗狀態低迷，睇怕咬唔入紅魔，中位數2.5球嘅入球細有1.55倍，勝在夠穩陣。
（Now 670及Fox Sports Play周五凌晨3時05分直播）
曼聯傷兵名單真係長到嚇死人，射手伊巴謙莫域、後衞馬高斯盧祖已經提早收咧，另外2位守將菲爾鍾斯、基斯史摩寧、中場保羅普巴仍有傷在身。咁都未夠慘情，上仗英超對史雲斯，一次過傷埋2位後衞勞基梳爾同艾歷拜利，成條防線幾乎做晒觀眾，莫連奴今場好可能要搵防中老大哥卡域克客串中堅。正因為後防人腳嚴重不足，以「寸王」嘅保守作風，更加唔會壓前進攻，寧願要求中前球員幫手返後協防，自然削弱入波機會。
寸王帶隊愈踢愈悶
事實上，曼聯喺「寸王」帶領下踢法愈嚟愈悶，各項賽事近14仗有12場總入球係2球或以下，而近5場歐霸盃有3場打和1比1，以及2場贏1比0。值得一提，曼聯近22次作客西班牙球隊，僅得2勝10和10負，勝出率非常低，今場隨時又悶和算數。
切爾達嘅歐洲賽經驗遠唔及曼聯豐富，尤其係阿根廷籍教練貝利索只有6年做主帥經驗，3年前先至去歐洲搵食，遇上戰術大師莫連奴比較輸蝕，相信首回合就算有地利都唔敢輕舉妄動。加上切爾達近3場全敗入得1粒，班人狀態嚴重走下坡，想贏亦有心無力，中位數2.5球嘅細盤夠晒穩陣。