日職周中快車今日有場重頭戲，浦和紅鑽主場迎戰鹿島鹿角，合演上季總決賽翻版戰；上季王者鹿角今季4仗聯賽作客全勝，不過榜首紅鑽亦好弗，近4仗聯賽主場全勝之餘，合共轟入17球，既然兩軍開季都咁威猛兼且火力十足，今仗進取啲，捧中位數3.5球入球大有2.8倍分頭咪走雞。
（有線61、201台周四下午1時直播）
季初交手合共入5粒
鹿角係上季日職首階段冠軍，紅鑽係次階段及總積分榜第1名，兩大勁旅順利躋身上季季後賽總決賽，當時兩回合比併雙方各贏1仗，而且大家都係喺作客環境下擊敗對手，最終鹿角僅憑作客入球優惠險勝封王，足證兩隊實力非常接近，任何一方主場出戰亦冇明顯優勢。
雙雄開季保持強勢，除咗喺亞冠盃分組賽攜手出線16強，雙方頭8輪聯賽亦有上佳演出，其中鹿角作客全勝，近2仗作客（包括亞冠盃）狂入8球；紅鑽就主場贏晒，兩大射手興梠慎三同拿費爾達施華分列射手榜頭2名，兩隊火力可以話係勢均力敵。
兩軍今季初曾喺開季的日超盃交手，當時鹿角喺中立場險勝3比2，今次再度碰頭，兩軍狀態比當時有過之而無不及，隨時再度合演入球騷，入球大（3.5球）玩得過。