周中喺歐聯4強首回合大勝馬德里體育會嘅皇家馬德里，今晚又要返西甲戰線，作客已降班嘅CF格蘭納達。牌面上皇馬梗係不勝無歸，不過「銀河艦隊」近期連場惡鬥，球員體力必受影響，教練施丹亦可能作出大幅度輪換，作客情況下讓球主客和讓3球辣得滯，捧1.93倍嘅讓球主勝好過。
（Now 632周日凌晨2時45分直播）
皇馬近期賽程勁密，自上月底「國家打吡」輸畀巴塞開始，今仗係佢哋14日內第5場賽事，尤其聯賽受到巴塞隆拿緊迫，壓力極大。加上周中先至喺歐聯硬撼同市死敵馬體會，下周中又要踢埋次回合賽事，施丹近期亦頻頻作出輪換，王牌球星基斯坦奴朗拿度等主力應會被收起，雙線作戰下難免有所保留。
雖然皇馬同CF格蘭納達實力上有差距，以「銀河艦隊」副選球員嘅質素，仍然好大機會拎晒3分，不過皇家馬德里喺「衝雙冠」嘅關鍵時刻，肯定會盡量保留力量，只求贏波而唔會追求大炒，事實上皇馬過去5次作客CF格蘭納達，只曾1次贏多過1球，今仗期望皇馬大勝似乎不切實際。
CF格蘭納達球員為前途搏命
CF格蘭納達已經篤定下季降落乙組，不過球隊喺冇「搶分」嘅需要下，球員反而可以放開包袱，爭取表現為自己前途而戰，而且CF格蘭納達今季主場鬥前列球隊如馬體會、西維爾、維拉利爾同畢爾包，4仗取得1勝1和2負成績，2場敗仗皆僅輸1球，今仗未必會大敗，受讓三球大把本錢喺手，讓球主勝值博。