祖記下周中同摩納哥踢歐聯4強次回合前，先喺今晚意甲主場對拖連奴，合演「都靈打吡」。由於祖記中前場人腳選擇有限，教練阿里基多數會繼續派出希古恩、保羅戴巴拿等進攻主力出擊，但防線球員則可能輪換，隨時收起鋼門保方。拖連奴要幫前鋒比洛迪爭神射手殊榮，應會主攻，中位數3/3.5球照揀入球大。
（TVB 302周日凌晨2時45分直播）
祖記領先第2位羅馬9分，只要今場贏波，羅馬又贏唔到AC米蘭，祖記就可以提早捧盃。「斑馬兵團」實現意甲6連冠美夢，只係時間問題，球隊重心應會放喺爭奪歐聯及意大利盃，完成「三冠王」偉業。因此，阿里基今場聯賽好可能會畀保方、基亞連尼、丹尼爾等防線老將休息。不過，佢哋鋒線嘅後備兵源薄弱，往往焗住繼續出希古恩、保羅戴巴拿、文迪蘇傑擔正，形成「前重後輕」，入得又失得。
比洛迪踩油爭神射手
拖連奴為面子而戰，希望喺「打吡戰」擊敗同市死敵，攞番個尾彩。球隊仲有1個目標，就係幫比洛迪奪取神射手殊榮，呢位23歲意大利國腳現時以25個入球，同羅馬前鋒迪斯高並列射手榜第1位，要好好把握餘下4戰甩開對手，相信拖連奴會盡力為比洛迪創造入波機會，佢近兩次對祖記，都有波入，如果祖記今場真係由後備門將尼圖把關，比洛迪入波機會就更高。
另一場意甲拿玻里主場對卡利亞里，拿玻里追到只落後羅馬1分，為打入前2，直接進身下屆歐聯分組賽，拿玻里必定踩行油，全力衝刺，有力大炒卡利亞里。（TVB 302周日凌晨零時直播）葡超波圖落後榜首賓菲加3分，理應要搏命追趕，但波圖近6場聯賽只有2勝4和，其中5場總入球係2球或以下，今仗作客馬里迪莫揀入球細好過。
（周日凌晨3時30分開賽）