兄弟波交手本來揀主隊永遠着數啲，但係今日場日職柏雷素爾主場鬥大阪櫻花就未必係呢回事，櫻花喺日聯盃玩大輪換，明顯係為咗今場波，留留埋埋博一鋪，受讓平半開個1.9倍下盤唔出奇！
（周六下午1時開賽）
無論由排名、往績以至今季數據去睇，第7位嘅柏雷素爾同第5嘅櫻花，屬於典型嘅五五波，兩隊史上對碰23次，各勝9場打和5次，目前未分勝負，甚至連今季聯賽數據都非常接近，以進攻次數為例，柏雷素爾場均係138.6次，櫻花係130.7次，差距唔大。
柏雷素爾鋪鋪衰收尾
但係重返日職嘅櫻花，今季一直保持高水準演出，自從季初喺聯賽以1比2不敵浦和紅鑽，聯賽連盃賽近11仗取得6勝5和，當中10仗上半場都能保持零失球，有7場波保持清白，只失7球更加冠絕日職，柏雷素爾想入波唔係咁易。而且櫻花幾日前喺日聯盃小勝廣島三箭1比0嗰場，大量起用二線兵同小將，一箭定江山嘅秋山大地打咗5年職業賽先首次入波，絕對係個大後備，可見櫻花係刻意留力打呢場「同期對決」，事關呢兩隊都係1995年正式成為日職會員，大家同樣想做同期大佬。
有韓籍守衞尹錫榮養傷嘅柏雷素爾，周中喺日聯盃就先勝後敗，主場對磐田山葉領先1球，居然响76分鐘起，10分鐘內連失2球輸波，3連勝走勢告終，再一次凸顯佢哋完場前15分鐘精神唔集中嘅毛病，對住櫻花前鋒柿谷曜一朗、杉本健勇、中場清武弘嗣呢啲高質攻擊球員，隨時晚節不保，所以櫻花個下盤同1.7倍入球細（2.5球）都好抵玩。