史雲斯救亡決心嗒拖肥
英超護級形勢非常緊湊，到底邊兩隊會陪新特蘭降班呢？相信離唔開米杜士堡、史雲斯或者侯城。其中排尾三、位處降班區嘅史雲斯今仗主場對「拖肥糖」愛華頓，不容有失，事實上「天鵝」史雲斯近期為搶分保住英超席位，踢出超水準，包括上仗打和曼聯。反觀愛華頓已獲歐霸資格，餘下3仗意義不大，爭勝決心唔及對手，平手盤捧史雲斯。
（Now 621及LeSports HK應用程式周日凌晨零時30分直播）
史雲斯落後尾四侯城2分，並已被尾五水晶宮拋離6分，「天鵝」最大希望係爭取反超前侯城，所以餘下3場聯賽對愛華頓、新特蘭、西布朗，1分都不能少。史雲斯自知形勢險峻，球隊上下近期都搏晒老命，包括主場以2比0擊敗史篤城，而上仗作客曼聯，表現唔比對手輸蝕，但輸咗球冤枉波，被紅魔前鋒拉舒福特「插水」博到12碼，幸好最後都逼和1比1，可見「天鵝」鬥志十足。
同埋史雲斯一向靠主場搶分，近6場主場取得4勝1和1負，所輸1場對手係熱刺，雖敗不辱，今仗返回自己地頭，對住有放軟手腳迹象嘅愛華頓，贏波機會樂觀。
愛華頓穩踢歐霸冇嘢爭
至於愛華頓上仗吞車路士3蛋後，打入前4位機會已非常渺茫，但就肯定穩佔前7位，可以參加下屆歐霸盃，今季基本上已可提早「收工」。唔講唔知，原來愛華頓一直被史雲斯食住，雙方近6次交手，愛華頓只有4和2負，平手盤揀史雲斯，比較穩陣。