荷甲冠軍大有機會提早一輪誕生！荷甲只剩下2輪聯賽，榜首飛燕諾只要今仗作客擊敗精英隊，就可提早1輪奪冠，戰意肯定非常高昂。飛燕諾近7次聯賽對精英隊，獲得全勝，其中6仗贏2球或以上，預料今仗可以反客為主，大勝精英隊慶祝捧盃，撐飛燕諾1.64倍讓球客勝。
（Now 671及Fox Sports Play周日晚8時30分直播）
飛燕諾現時領先「2哥」阿積士4分，只要今仗贏波就可穩奪冠軍。該隊對上1次獲得荷甲錦標，已是1999年，球隊難得今季一直發揮出色，可望相隔18年再嘗聯賽冠軍滋味，球隊上下自然興奮莫名，更渴望盡快圓捧盃美夢，因此今仗即使作客都會主攻求勝。
近7次聯賽贏晒精英隊
事實上，飛燕諾季尾愈戰愈勇，近4仗聯賽獲3勝1和，3場勝仗都贏2球或以上，包括大炒伊高斯8比0，可見他們對弱隊絕不留情，既然球隊近7次聯賽贏晒精英隊，今場勢必再歎私房菜，讓球客勝必捧。
跟住睇吓意甲熱拿亞對國際米蘭，熱拿亞要護級，主場一定搏命，國米近期入得又失得，仲有後衞謝臣梅里路停賽，防線雪上加霜，今場捧入球大最啱。
（TVB302周日晚9時直播）
至於英甲升班附加賽4強次回合，費列活特主場對巴拉福特，費列活特係神奇球隊，近10季6度升班，首回合落後0比1，今場一定要贏波殺入決賽，平手盤抵捧。
（周一凌晨1時30分開賽）