一隊谷唔起 一隊專注歐霸
英超接近尾聲，隨住熱刺作客輸畀韋斯咸，車仔個冠軍已經十拿九穩，但餘下兩張歐聯入場劵就爭崩頭，今晚阿仙奴主場同曼聯攜手合演「仙魔大戰」，兩支老對手仍然要為前4打拚，不過喺歐霸前途大好嘅曼聯有條件玩留力，而主隊阿仙奴今季表現又失色，Yennie推介有3.55倍分頭嘅和局。
（Now 621及LeSports HK應用程式周日晚11時直播）
同時要應付聯賽及歐霸兩條戰線嘅曼聯，剛喺歐霸4強首回合作客小勝切爾達1比0，領隊莫連奴就話會押重注喺歐霸度，今晚考慮留力。查實「寸王」咁精明，應該心中有數，4支爭逐歐聯席位嘅球隊中，利物浦及曼城賽程最有優勢，皆因佢哋之後嘅對手都只係中下游分子，失分機會較低。而「紅魔鬼」搶分衝入前4嘅路絕對難行，除咗今晚作客「兵工廠」外，下輪又要惡鬥聯賽「二哥」熱刺，就算兩場硬仗贏晒都唔係肯定入到前4，仲分分鐘傷多幾件添！
曼聯最近場場增添傷兵，早前有王牌射手伊巴謙莫域重傷提早收咧，而上場歐霸後又輪到艾舒利楊格勇戰下受傷，以莫帥咁精打細算嘅性格，有理由相信佢真係會畀班主力抖吓，留力喺歐霸搏殺好過。
阿仙奴前線令人失望
主隊阿仙奴嘅領隊雲格就客氣咁話，就算曼聯人腳作出調動，都係強陣喎！「兵工廠」暫時以60分排喺第6位，「搶4」形勢最嚴峻，就算可以超越第5位嘅曼聯，都未必過到曼城或利物浦。況且阿仙奴今季表現麻麻，多位主力谷唔起，其中最令球迷失望嘅一定係「戰神」艾朗藍斯！呢位威爾斯中場不嬲有「玻璃」特質，今季更係傷患不斷搞到狀態低迷，開季至今仲未開齋，基奧特等中前場主力亦腳頭無靈，鋒力靠唔住，加上佢哋上場北倫敦打吡輸波後，今季注定要畀熱刺騎住，大大打擊士氣，就算有主場之利，睇怕今晚都幾難拎到甜頭，和局絕對係信心之選。