冠軍在望 Vs 誓不投降
英超鬥到入直路，車路士衝冠2連擊，今晚首先主場迎戰米杜士堡！由於次席熱刺上仗輸波，車仔只要未來2仗全勝，就可以提早封王，今仗對手只係尾二嘅米杜士堡，可以放膽主攻，爭取大勝壯聲威。米杜士堡急需搶分護級，亦冇得退縮，上仗打和曼城2比2，為球隊打下強心針，無懼同車仔駁火，一於博中位數3.5球嘅入球大。
（Now 621及LeSports HK應用程式周二凌晨3時直播）
車路士領先第2位熱刺4分，兼踢少1場，如果今場擊敗米杜士堡，就正式拋離7分，跟住下場贏埋西布朗，即可提早2輪捧盃。以車仔今季穩定水準，重奪英超錦標已無懸念，冠軍在望，相信車仔球員都會特別興奮，可以放下心理包袱，踢得更加放，盡情表演。
事實上，「藍戰士」踏入季尾，經常製造大比數交易，包括英足盃4強，贏熱刺4比2之後，再以同樣比數喺聯賽擊敗修咸頓，上仗作客照炒愛華頓3蛋，換言之近3仗共轟入11球。更何況車仔近13場聯賽主場，贏咗12場，今仗勢必狂攻米杜士堡。
米杜士堡輸波即降班
米杜士堡落後尾四史雲斯7分，如果今仗輸波就會降班，肯定豁出去一搏。米堡近2場聯賽取得1勝1和，表現唔錯，包括上場打和曼城2比2，證明有能力喺強隊身上搶到分，大大提升今場信心，實行同車仔死拚，隨時只攻不守，開大機會高。