近6作客輸5場
英超今晚有場關鍵補賽，力爭聯賽前4位置嘅阿仙奴，挾住啱啱擊敗曼聯嘅餘威作客「聖人」修咸頓。「兵工廠」近期改踢343陣式後雖有起色，不過作客表現仍然係慘不忍睹，近6仗聯賽作客輸咗5仗，而且球隊目前面對內憂外患，今仗作客「凶地」聖馬利球場隨時又甩轆，修咸頓受讓之下，工廠仔捧1.8倍讓球主勝。
（now 621及LeSports HK應用程式周四凌晨2時45分直播）
阿仙奴上仗聯賽主場贏曼聯2比0，不過「紅魔鬼」呢場波並冇出盡全力，而且「兵工廠」中場格列沙加帶傷上陣下，尾段又再傷出，好可能會缺席呢場大戰。阿仙奴依家喺每場波都1分不能少之下，肯定要主動搶攻，冇咗格列沙加控制中場，隨時畀修咸頓嘅反擊打爆。
聖人防線頂得兩嘴
事實上，「兵工廠」今季最大問題係作客成績極差，睇番佢哋最近10場聯賽作客，只贏過尾4嘅史雲斯同尾2嘅米杜士堡，其餘8仗就得1和7負劣績，而且每場比賽起碼都失2球，可見阿仙奴喺客場環境幾乎喪失全部戰鬥力，今仗又點會有本事去讓修咸頓呢？
主隊修咸頓向來踢法實際，踢法上明顯剋住「兵工廠」，自2012/2013球季「聖人」重返英超後，近4次聯賽主場面對阿仙奴有2勝2和不敗佳績。雖然阿仙奴今季曾經喺足總盃作客5球大破修咸頓，但當時「聖人」派出副選出戰，參考價值唔高，修咸頓上仗守和利物浦顯示出強勁防守力，阿仙奴要贏波難度好高。