今日場日乙大分三神對名古屋鯨魚，係一場B級對A級嘅賽事，增兵指數同綜合實力評分都畀日媒列為A級嘅鯨魚，被視為升班大熱之一，平手盤博鯨魚個1.9倍客隊勝好正常。
（周六下午1時開賽）
雙箭攻擊指數爆燈
今季降落日乙嘅名古屋鯨魚，更換一批球員之後銳意升班，打法比過去更加主動，目前以12戰入21球成為日乙最強攻擊王，無論進攻次數、攻擊成功率以至場均入球，都喺數據統計榜名列前茅。雖然今場佢哋有頭號射手永井龍養傷，不過瑞典1米99長人中鋒施莫域搭巴西10號仔菲臘比加西亞呢個雙箭頭組合，迄今有8球斬獲，加埋前廣島三箭鋒將佐藤壽人多數可以復出，中場八反田康平又係大分稱霸J3升上日乙嘅功臣，熟晒對手路數，牌面可以睇高半線。
當然，大分三神個監督片野坂知宏，踢過同教過廣島、大分、大阪飛腳、柏雷素爾以至仙台維加泰好多隊波，鯨魚唔少人佢都帶過，肯定會有針對性部署。而且佢嗰套3-4-2-1陣式，實際以搶中場為主，同3-5-2冇乜分別，防守相當穩健，你咪睇大分經常畀人撳住打，但係所有對手將攻擊成功轉化為入波嘅比率只得5.9%，佢哋今場唯一蝕在中場大將松本怜、清本拓己倦勤，正選門將修行智仁亦有傷，所以幾難守得到尾，平手盤都係要鯨魚着數啲。