藍月亮搶前4決心捉狐狸
今晚英超早場演「雙城記」，曼城主場迎戰「狐狸」李斯特城，「藍月亮」曼城今季四大皆空之後，餘下最大目前就係力保聯賽前4位，參加下屆歐聯，球隊上仗重現霸氣，大炒水晶宮5蛋，決心十足。相比之下，李斯特城已經成功護級，可以大踢風流波。雙方戰意有天壤之別，曼城讓球半、兩球，照樣捧上盤。
（Now 621及LeSports HK應用程式周六晚7時30分直播）
曼城現時只係領先第5位阿仙奴3分，稍有閃失，隨時畀兵工廠反超前，「藍月亮」一旦跌出前4，對球隊絕對係大災難，屆時領隊哥迪奧拿肯定冇得留低。慶幸曼城知恥近乎勇，經過連續2場失分之後，上仗大勝水晶宮5比0，取得球隊今季最大勝仗，為眾星打入一支強心針，亦顯示哥帥主攻戰術仍然奏效。
爭得失球擺大頭盡炒
哥迪奧拿早前講過，2位射手阿古路同加比爾捷西斯位置並冇重疊，可以同時上陣。由於英超排名，同分先計得失球差，曼城唔止要攞齊3分，更加希望贏多幾球，一旦出現同分，都有着數，哥帥今仗或會擺大個頭，盡炒對手。
另一邊，李斯特城換帥之後，經過一輪瘋狂搶分，成為脫離降班旋渦，但已無緣爭下屆歐洲賽入場券，換言之，餘下3場聯賽，對「狐狸」而言，只屬例行公事。陣中球員或者開始計劃緊抖暑去邊度旅行。占美華迪、馬列斯等主將甚至可能下季離隊，依家都係時候為自己前途打算，未必再為李斯特城賣命。同埋李斯特城今季遇強即屈，5次作客Big 6球隊，有3次輸3球或以上，今仗受讓球半、兩球都冇着數。