攞1分都馬上封王
祖雲達斯繼打入歐聯決賽後，今晚有望實現意甲6連冠！斑馬兵團今仗作客只需打和羅馬，就足以提早2輪封王，以祖記穩健防守，要攞1分並唔難，特別係羅馬首席射手迪斯高受傷缺陣，更難威脅保方把守嘅大門，今仗隨時悶和收場，求穩陣可博中位數2.5球嘅入球細。
（TVB 302周一凌晨2時45分直播）
今季意甲剩低3輪賽事，榜首祖雲達斯領先次席羅馬7分，並比第3位拿玻里多8分，由於祖記今季對拿玻里取得1勝1和，對賽成績佔優，所以今場唔輸就穩奪聯賽冠軍。加上祖記剛於上周中歐聯4強次回合同摩納哥激戰完，球員未必回得切氣，今場冇必要同羅馬硬碰，好可能歎慢板玩「拉布」，攞1分算數。
迪斯高缺陣 羅馬戰意成疑
羅馬上仗作客大勝AC米蘭4比1，但同時付出沉重代價；今季轟入27球嘅迪斯高勇戰受傷，無緣呢場榜首大戰。事實上，羅馬到呢個階段亦深明難以反超前祖記，今場爭勝決心成疑。參考埋羅馬近6次主場對祖雲達斯，有5次總入球係2球或以下，既然雙方對戰唔旺入波，中位數2.5球嘅入球細有1.95倍當然最值得捧場。