新星搶韁火力猛
摩納哥距離法甲冠軍寶座只有一步之遙，佢哋今晚主場對聖伊天，只要拎1分已經夠騷17年之癢重奪聯賽冠軍，但摩納哥今季由年輕新星孭飛，充滿活力同衝勁，當然唔會求和咁衰仔，勢必盡數聖伊天以大勝慶祝奪冠，讓球盤摩納哥讓兩球咪畀盤口嚇窒，照捧2.5倍讓球主勝！
（TVB 303周四凌晨3時直播）
聖伊天冇嘢爭等收咧
摩納哥對上一次捧法甲冠軍己經係2000年，當時以查斯古特為首嘅黃金一代崛起，創出佳績。無獨有偶佢哋今季都係以新星為骨幹，憑活力大踢進攻足球，今季聯賽已轟入102球，仲多過西甲豪門皇馬。摩納哥目前領先第2位巴黎聖日耳門3分，兼踢少1場，換言之餘下兩仗只要攞多1分，已經穩奪冠軍。
雖然話和波都夠奪冠，但摩納哥陣中咁多新星，正所謂年少氣盛，點會同你勒住踢，相信會出盡力爭取大勝封王，加上今仗係摩納哥主場謝幕戰，肯定會喺擁躉面前攞威。以摩納哥本土賽主場9連勝強勢，其中5場大勝3球或以上，相反對手聖伊天冇嘢好爭等收咧，上仗主場都慘吞巴黎聖日耳門5蛋，今仗對住攻力更強嘅摩納哥，大敗唔奇，摩納哥就算讓到兩球，讓球主勝仍然值博。