哈利冧莊神射手要問過Ａ山
熱刺前鋒哈利卡尼上仗對李斯特城，食出大四喜，累積入26球，反超前愛華頓前鋒盧卡古2球，好大機會連續兩季奪得神射手殊榮。不過，世事無絕對，既然哈利卡尼可以1場入4球，其他射手亦可能突然着火。特別係阿仙奴要爭前4位，「A山」阿歷斯山齊士隨時大發神威數胡，追到哈利仔都唔出奇。
事實上，「A山」腳風非常順，近3場聯賽轟入4球，包括上仗梅開二度；阿仙奴今晚絕地反擊，勢必全力進攻，「A山」肯定有大把入波機會。各位球迷要留意，根據足智彩規定，如果有超過1名球員以同樣入球，平頭勝出「神射手」，每1勝出選擇嘅投注金額，將按平頭勝出人數，分為相同數目等份。
平頭勝出有特別計法
例如一旦阿歷斯山齊士同哈利卡尼，同樣以26球勝出「神射手」，買100元阿歷斯山齊士，就要先100元除2，當你投注咗嗰50蚊輸咗，剩餘嘅再乘賠率，即係50元乘以18倍，而唔係100元乘18倍，只可收番900元。如果有3位球員以同樣入球數字勝出「神射手」，投注金額就除3，如此類推，愈多球員勝出「神射手」，派彩就愈少，甚至會出現買中，但輸錢嘅情況。