搶前4被動 贏先有希望
嚟到英超煞科戰喇！餘下兩個歐聯席位，由曼城、利物浦同埋阿仙奴爭奪，曼城只要今晚唔係大敗就可以完成任務，而利物浦只要今晚贏波，或者拎到唔比阿仙奴差嘅戰果，都可以穩入前4。至於失分最多嘅阿仙奴形勢相當被動，佢哋除咗今晚要擊敗「拖肥」愛華頓，仲要寄望「藍月亮」同利記失分先有希望。阿仙奴今晚一定會全力搏盡，除咗要搶分，亦要為報答主場球迷而戰，相信贏波贏盤唔係問題，心水推介上盤。
（Now621、LeSports HK應用程式周日晚上10時直播）
為咗爭入前4，阿仙奴一分都不能少！最近兵工廠表現回勇，聯賽豪取4連勝。佢哋上輪聯賽主場憑住「山神」阿歷斯山齊士梅開二度，以2比0擊敗包尾大幡新特蘭。而曼城亦喺主場輕取西布朗3比1，以75分超越利物浦，升上聯賽榜第3位，而阿仙奴就以72分排第5，落後紅軍1分，形勢相當被動。如果兵工廠想爭入前4，今晚對愛華頓非勝不可，同時亦要寄望曼城或者利記失分，否則今季唔單只22年來第一次排名低過熱刺之外，亦拎唔到歐聯資格。有幾個情況，阿仙奴都可以拎到前4。第一，如果阿仙奴擊敗愛華頓而利物浦贏唔到米杜士堡；第二，阿仙奴同愛華頓以0比0或者1比1打和，而利物浦輸3球或以上；第三，阿仙奴同愛華頓2比2打和，而利物浦輸0比2；第四，阿仙奴贏愛華頓而曼城輸畀屈福特5球或以上。雖然機會好似好渺茫，但今晚始終係兵工廠今季最後一場主場賽事，相信佢哋一定會做番場好戲畀大家睇！
愛華頓無欲無求輸戰意
仲有呀，由開季至今攻入23球、交出10次助攻嘅「山神」，早喺對史篤城一仗已整傷大腿，到上場對「黑貓」，開波前幾個鐘先通過體測落場，最後阿仙奴都係靠呢位智利前鋒包辦兩個入波贏新特蘭，保住爭前4嘅希望，連領隊雲格都大讚呢位贏波功臣，話當「山神」落場掂到個波，就會變成惡魔，咩痛楚都拋諸腦後，唔知今晚喺自己地頭，對住無欲無求、戰意一般嘅愛華頓，又會入幾多粒呢？就算讓球盤阿仙奴讓到一球、球半咁深，相信都無問題，上盤絕對係值得支持！