坐鎮魯營歡送安歷基
另一邊廂嘅巴塞隆拿將於主場迎戰伊巴，巴塞依家落後皇馬3分，今場除咗必須贏波，仲要望皇馬輸波，巴塞先可憑較佳對賽成績反壓皇馬捧盃，雖然形勢被動，但巴塞至少要做好本分先有價講，而且今仗係教練安歷基喺魯營主場最後一次帶兵出戰，相信巴塞上下都好希望用一場漂亮勝仗歡送呢位功勳主帥，捧中位數4.5球嘅大盤啱數。
（Now 633周一凌晨2時直播）
伊巴踢緊風流波
巴塞能否成為聯賽3連冠雖然要睇人面色，但有今屆歐聯16強反勝巴黎聖日耳門嘅「大奇迹日」支持，相信球隊上下都唔會輕言放棄。過去兩季合共幫巴塞贏得2次西甲、2次西盃、1次歐聯、1次歐洲超級盃同1次世冠盃7項冠軍嘅教練安歷基，早已表明今季結束便會離隊，由於下周對艾拉維斯嘅西盃決賽會喺卡達朗球場舉行，所以今場會係安歷基最後一次喺魯營主場帶隊出戰，就算最終未能後上封王，大勝一場都總算可以為主場球迷交代。
對手伊巴排聯賽第9位早已護級成功，季尾大踢風流波，冇心理包袱之下隨時與巴塞鬥攻。伊巴上季聯賽作客巴塞曾經先開紀錄，之後雖然連輸3球反勝為敗，但足以證明伊巴有本錢喺魯營球場取得士哥。加上巴塞對上11仗主場聯賽雖然全勝，但當中只有4場冇失波，對住奧沙辛拿、希杭、雷加利斯等下游球隊都有失，今場讓球主客和巴塞讓三球略嫌太多，捧4.5球嘅大盤較上算。