澳洲國家隊剛剛喺星期二舉行嘅世界盃外圍賽亞洲區附加賽，憑老將卡希爾梅開二度救全家，成功淘汰敍利亞，將會喺附加賽同洪都拉斯爭奪決賽周入場券。雖然國家隊要比賽，但上周澳職都冇讓路照開咧，今日第二周比賽當然繼續上演，直播戲碼就有布里斯班獅吼主場迎戰阿德萊德聯。
（有線64及203台周五下午4時50分直播）
布里斯班獅吼開季表現令人相當失望，揭幕戰兩球輸咗畀卡希爾缺陣嘅墨爾本城，連同之前喺澳洲足總盃輸畀墨爾本勝利，開季經已兩連敗！獅吼今季有兩大主力射手波里路同埋占美麥卡倫他投，對球隊鋒力影響唔細，至弊係新簽返嚟、曾經踢過米杜士堡同安玻里等等中下游球會嘅意國射手馬卡朗尼「年事已高」，明顯高峰已過，上場表現近乎隱形，似乎幫唔到球隊改善攻擊力問題。
阿聯銳意增防
阿德萊德聯上場作客逼和威靈頓鳳凰，佢哋之前喺澳足盃表現亦出色，接連擊敗過紐卡素噴射機、墨爾本勝利同埋海德堡聯，依家已經係四強分子，可見狀態相當之唔錯。球隊今屆銳意改善防守力，簽入曾經踢過比錫達斯嘅土耳其中堅古路姆，亦有門將保羅艾素加盟，暫時效果唔錯。個人睇法，今場阿德萊德聯作客受讓平半非常值捧噃。