今屆歐聯英超球隊表現出色，歐霸盃則有阿仙奴支撐大局，身處H組嘅阿仙奴今輪作客塞爾維亞球隊貝爾格萊德紅星。阿仙奴分組賽2戰2勝，出線機會樂觀，相信領隊雲格會繼續用副選出擊，留力踢聯賽。貝爾格萊德紅星防守穩陣兼有地利，頂得住兵工廠火力，中位數2.5球嘅細盤有2.05倍值博。
（Now 633周五凌晨1時直播）
阿仙奴領隊雲格一早講明會派副選應付歐霸盃分組賽，效果比預期好，先後擊敗科隆同巴迪，已拋離第3位巴迪5分，出線唔成問題。反而最令雲格煩惱係英超，特別係上場輸畀屈福特後，已落後榜首曼城9分，試問仲邊有餘力兼顧歐霸，同埋要留意阿仙奴今季各項賽事，5場作客只有1勝1和3負，其中3場冇波入，今場造訪小組入面較具實力嘅貝爾格萊德紅星，要入波唔易。
貝爾格萊德紅星主場夠穩
貝爾格萊德紅星有4分在手，領先巴迪3分排次席，今場只要唔輸，起碼可保住頭兩位出線席位，冇必要冒險主攻。呢支塞爾維亞老牌球隊近14場主場獲12勝2和，其中10場保清白之身，表現四平八穩，預料今場會係拉鋸戰，入波唔會多。