美職進入季後賽階段，西岸第1輪賽事周五早上上演阿特蘭大聯主場對哥倫布機員。新軍阿特蘭大聯今季強勢加入美職聯戰團，表現絕對唔輸蝕畀一班老牌球會，尤其喺靚爆新主場平治體育館表現特別醒神，常規賽曾經主場13場不敗，而且今季兩次面對哥倫布機員全勝，今場再喺季後賽碰頭有望照辦煮碗，一於捧1.61倍主勝。
（無綫myTV SUPER 303周五早上7時直播）
美職聯近年積極擴充規模，今年就有兩支新軍加入，令到參加常規賽嘅球隊增至22支，其中出盡風頭肯定係阿特蘭大聯，皆因佢哋第1年加入大聯盟即打入季後賽。呢支美職新軍咁弗，主因有一班瘋狂球迷支持，今季常規賽佢哋就好幾次坐爆新主場，兩度打破大聯盟單場入場人數紀錄，加上球隊有前巴塞隆拿同阿根廷教頭馬天奴領軍，呢場仲有巴拉圭中場米基爾阿米朗傷愈復出擔正，實力不容忽視，夠料贏作客表現麻麻嘅機員。
侯斯頓守將缺陣冇薩氣
同日另一場季後賽有侯斯頓戴拿模主場迎戰肯薩斯體育會，侯斯頓戴拿模雖然近4仗主場不敗，不過後衞佐治馬爾基同迪拉加沙今場齊齊倦勤，面對近4客戰都有波入嘅肯薩斯體育會，主隊讓球擇使，捧1.68倍讓球客勝好過。
（無綫myTV SUPER 303周五早上9時30分直播）