傷兵滿營 戰術被洞悉
常言道創業難、守業更難，上季英超冠軍車路士季初頻頻失分，已被榜首曼城拋離9分，排名甚至比今仗對手屈福特更低，車仔各種問題浮現，連主帥干地都躁躁地喺記者會上發爛渣，今晚主場面對奇兵屈福特，讓一球、球半有暗湧，樂比捧下盤。
（Now 622及LeSports 周六晚7時30分直播）
自從曼聯喺07至09年度勇奪3連霸之後，冇一隊英超球隊能夠衞冕成功，可見英超競爭之激烈。車路士上季最大優勢，就係唔使踢歐洲賽，養尊處優自然有好表現，但今季要雙線作戰，估唔到踢到10月已傷兵滿營，中場更係重災區，影響最大當然係3料足球先生尼高路簡迪缺陣，令隊波進退失據。
除真禾特呢位長期傷兵外，泰莫爾巴卡約高同大衞雷斯喺周中歐聯對羅馬時均勇戰受傷，雖然傷勢唔算嚴重，但如果好似艾華路莫拉達咁狀態未十足就焗住上陣，隨時弄巧反拙，整體而言車仔板櫈深度嚴重不足，坐喺後備席上嘅巴舒亞伊、梅桑達及羅拔堅尼地都畀唔到人信心。
車仔另一隱憂，係上季相當成功嘅343陣式已被對手洞悉，隨着車仔上季變陣成功，好多球隊都改用3後衞陣式，戰術再冇新鮮感，其實所有陣式都有優點同缺點，當其他球隊熟習咗之後，自然會搵到破綻。車仔近4仗失咗7球之多，連之前7場聯賽入唔到波嘅水晶宮都可以入到佢哋2球，防線真係出現咗問題，棄用隊長加利卡希爾嘅呼聲亦愈嚟愈高。
屈福特少帥馬高施華有料
屈福特上季仲護緊級，今季竟然殺上前列，領隊馬高施華功不可沒，其實馬高施華上季季中執教侯城，已充分表現出佢嘅實力，即使球隊降班依然大把人爭，呢位年僅40歲嘅少帥有佢自己一套，唔會一味死守，難得係今季幾位新兵都交足貨，好似年僅20歲嘅巴西小國腳李察利臣已經有3球進帳，屈福特今季聯賽僅輸過1場，對住利物浦同阿仙奴都不敗，車仔今場真係有啲危！