周四凌晨英聯盃有英超戲碼強強對碰，車路士喺史丹福橋球場迎戰愛華頓。「拖肥」開咧歐戰同聯賽都失準，結果大戰當前焗炒領隊朗奴高文，班波群龍無首，加上要專注聯賽護級，盃賽面對車路士根本無心戀戰，主隊有望趁火打劫，一於揀讓球主勝。（周四凌晨2時45分開賽）
上年六月加盟愛華頓嘅朗奴高文，上季成功帶領球隊以第7名踢完英超，仲好彩攞到今季歐霸參賽資格，於是今季季初雄心壯志嘅「拖肥」同朗奴高文，用咗將近1億4000萬鎊（約14億港元），引入門將比克福特同攻擊手基菲爾施古臣等球員。諷刺嘅係，幾位今季高價加盟嘅新兵個個熄晒火，加上使咗咁多錢都揾唔到人頂替離隊嘅上季射手盧卡古，搞到多條戰線全部冧檔，上仗主場2比5大敗阿仙奴之後，聯賽仲跌到聯賽榜倒數第3，如果唔係自由身免費由曼聯加盟嘅朗尼頂住，場場搏晒老命入波搶分，球隊狀況可能仲差，結果球會果斷同朗奴高文講分手，繼法蘭迪保亞同格力沙士比亞後，成為英超今賽季第3位黯然退位嘅領隊。
車路士主場食住「拖肥」
主隊車路士啱啱聯賽反勝對手，終止主場連續2場不勝，加上車仔近6次主場面對「拖肥」不敗之餘，仲取得5勝，往績食住客軍，愛華頓為專注聯賽翻生肯定冇精力兼顧盃賽，戰意成疑，睇好主隊輕取對手，揀讓球主勝好。