距離2018年俄羅斯世盃決賽周剩番唔夠8個月，但到底香港邊一間電視台會轉播呢項4年一度嘅盛事，至今仍然像霧又像花，日前筆者與其中一個part time僱主香港電台嘅體育首腦研究呢件事，亦未有定案，不過大家都認為近屆常客荷蘭與美國無緣決賽周，將令不少商家蒙受損失。
無冕之王荷蘭無得踢決賽周固然可惜，而美國雖然唔算係足球強國，但之前已連續7屆殺入決賽周，不容小覷，而且佢哋擅於從體育運動開發商機，尤其係轉播賽事收視率極高，轉播到世界各地嘅範圍又大，可惜未能取得入場券，勢必冷卻當地球迷對世盃嘅熱情而影響收視，從而波及各類型商品如波衫、紀念品嘅銷情，亦連累埋發展穩步上揚嘅美職。
講開美職，由於筆者對該國各類型體育運動深有研究，因此經常獲「三色台」收費電視邀請去評述美職，而2017年年度嘅常規賽啱啱完結，喺東西岸合共22隊角逐中，最終由東岸球隊FC多倫多以69分奪得常規賽總冠軍。踏入周四早上開始，東西岸頭6名、合共12隊將會進行季後賽，東西岸頭2名於首輪輪空，先由兩岸第3對第6位、第4對第5位進行1場過淘汰賽爭入4強，不妨睇定啲先落注。美職近年星味不減，單是紐約城就有射手韋拿及傳球大師派路壓陣，芝加哥火燄亦有「小豬」舒韋恩史迪加擔大旗，值得一提嘅，係原本排西岸1哥近整季嘅溫哥華白帽，竟於季尾接連失利而滑落至第3，儘管仍取得季後賽入場券，但表現咁唔穩定，難怪溫哥華呢個喺隊制運動甚少捧盃嘅地方，被諷為永不奪標的城市（A town without a champion）。
金句：美國荷蘭兩大足球國家，明年無緣俄羅斯害商家。