卡希爾歸隊人腳更完整
澳職尋日踢完周五獨腳戲，今日同聽日各有兩場波接力。今日下晝兩點半開始，球彩台連環直播五場波。先有澳職「雙料娛樂」，打頭陣嘅係墨爾本城主場迎戰威靈頓鳳凰，接住有重頭戲「悉尼打吡」；晚飯前有德乙，之後慣例兩場德甲。嘩，呢圍「足球宴」擺足12個鐘頭，很滿足吧？心水方面，頭場墨爾本城對威靈頓鳳凰，我就撐墨爾本城讓一球嘅上盤喇。
（有線64及203台周六下午2時35分直播）
今季嘅墨爾本城開季真係弗到痹，揭幕戰主場以2球擊退布里獅班獅吼，上場「墨爾本打吡」，佢哋喺作客嘅情況下，都能夠擊敗墨爾本勝利全取3分，依家以2戰全勝排榜首。
講番人腳，「墨城」今季有老牌門將加利高域加盟，大大增強防線穩定性，中場布魯士卡馬奧腳風又順，踢2場已經入咗3粒，加上「澳洲之寶」卡希爾踢完國家隊後已經歸隊，教練喺調兵遣將方面自然有更多選擇啦。
鳳凰前鋒質素麻麻
呢個禮拜繼續作客嘅威靈頓鳳凰，佢哋開季第一場主場出擊，慘被阿德萊德聯逼和，上場造訪班霸FC悉尼好明顯唔夠打，結果當然係3分全失啦。陣容方面，雖然繼續有射手基舒拿壓陣，但始終呢位斐濟前鋒質素有限，因此今場要攻破墨爾本城嘅防線都唔係咁易。翻查往績，墨爾本城近4次同威靈頓鳳凰對戰都贏晒，賽前信心十足，綜合各項因素，呢場梗係揀墨爾本城上盤着數啦。