歐聯分組賽F組今晚上演頂級大戰，意甲榜首拿玻里主場迎戰英超「一哥」曼城。兩支勁旅上輪交鋒，拿玻里作客以1比2落敗，不過今仗回師無敵主場，面臨出局壓力嘅佢哋肯定盡地一煲，鬥心唔使懷疑，拿玻里主場受讓平半好抵玩，1.8倍下盤必捧！
（有線64、203台及有線流動版周四凌晨3時45分直播）
拿玻里目前3戰只得3分排F組第3位，落後次席薩克達3分，今仗如果再輸分分鐘被拋離，出線形勢會相當被動，主場出擊必定全力砌盡。不過球迷又唔使太擔心，拿玻里剩低3輪有2仗喺主場出擊，佢哋今季7次主場賽事，獲6勝1和強勁戰績，加上5次歐洲賽主場對英超兵錄得4勝1和，包括近3次歐聯迎戰英超隊全勝，證明有一定把握。
曼城有後顧未必去盡
曼城喺呢組3戰全勝，今仗只要拎1分已經可以提早出線，爭勝意欲多少會受到動搖，況且「藍月亮」3日後又要喺英超惡戰阿仙奴，喺歐聯出線席位頗為穩陣嘅情況下，今仗遠征意大利未必出盡全力，只求1分完成任務就收工，雖然小讓平半但值博率唔高，捧番拿玻里下盤穩陣。