周日凌晨1:30免費直播
德甲今夜上演榜首大戰，1哥拜仁慕尼黑作客火併2哥多蒙特，東網破天荒首次直播德甲，大家可以免費收睇呢場巔峰對決。多蒙特近期於各項賽事接連受挫，不過佢哋主場對拜仁例牌踢高一皮，客軍近期征戰頻密傷兵亦唔少，雖然拜仁質態佔先贏面稍高，但近季作客多蒙特勝率不足3成，黑柴相信呢場大戰會激鬥到最後一刻，多蒙特就算輸都唔會大敗，小敲有4倍好分頭嘅讓球和。
（東網on.cc周日凌晨1時30分直播）
多蒙特近期3線作戰遇到好大麻煩，踏入10月起近6場正式賽事只得1勝，所贏對手仲只係德丙嘅馬格德堡，聯賽近3戰只得1分畀拜仁搶咗榜首位置，歐聯兩戰弱旅尼科西亞都贏唔到已處於出局邊緣，教練保斯嘅戰術受到外界質疑。可喜嘅係球隊內部依然團結，幾位主力球員都先後企出嚟為教練護航，佢哋認為主場對尼科西亞一役多蒙特全面佔優，射門次數達29比4，運氣不濟係贏唔到嘅最大原因，今晚主場鬥拜仁好有決心踢番場爭氣波。
西法倫對決往績均勢
多蒙特近年每遇拜仁都特別精神，記得去年4月佢哋同樣面對過困境，喺歐聯兩負摩納哥出局，但月尾德國盃作客擊敗拜仁走出陰霾，最終仲成功捧盃。睇番近4年往績，多蒙特主場7鬥拜仁成績係2勝3和2負，雙方所贏兩仗都係1球起2球止，拜仁去到西法倫球場明顯毫無優勢。多蒙特今仗仍然有比薛斯基、馬高列奧斯、艾歷杜姆等長期傷兵，小將薩加度停賽，好在隊長舒姆沙、 歐聯輪休嘅卡斯特羅同耶莫蘭高都回歸正選，陣容絕對見得人。
冷敲有4倍分頭讓球和
拜仁喺老帥軒歷基斯出山後於各項賽事已經錄得6連勝，包括德國盃對萊比錫射贏12碼，今仗仲有射手羅拔利雲度夫斯基傷愈復出，但陣中仍有紐亞、祖安巴尼特、列貝利同湯馬士梅拿等傷兵，球隊經過頻密征戰近期銳氣亦見放緩，今晚作客火併多蒙特大勝可能性唔高，不如冷敲有4倍嘅讓球和。