富豪3哥貧民阿4初邂逅
除咗尾場榜首大戰，頭場亦排演咗3、4名前列對碰，3哥RB萊比錫主場迎戰暫列第4嘅漢諾威，今場係富豪同貧民對決，有趣嘅係雙方喺歷史上第1次交鋒，預計有足夠新鮮感帶嚟激情同火花，推介中位數3.5球大盤。
（Now 670、有線61及201台周六晚10時30分直播）
萊比錫雖然小將當家，但呢班小將個個都係貴嘢，根據權威網站《轉會市場》嘅估價，佢哋一線隊全軍總身價達到2.56億歐元，排德甲第3，僅次於兩大班霸拜仁（6億歐元）同多蒙特（4.38億歐元），目前能夠位列三甲其實相當正常。相反漢諾威呢支貧民球隊，全隊總身價估值只係5,400萬歐元，係18支德甲估值最平嘅球隊，現時能夠位列前4的確值得自豪，睇番萊比錫陣容，佢哋嘅中場拿比基達同前鋒迪姆華拿，每人身價都超過5,000萬歐元，即使任揀1個都足以等值於漢諾威全軍30名一線隊球員。
雖然貧富懸殊，不過萊比錫今場讓到1球、球半實在太多，漢諾威嘅快速反擊近期踢到得心應手，上輪4比2大破多蒙特後更加信心爆棚，萊比錫今仗有主力中堅韋利柯賓停賽，就算贏面較高都難保不失，預計今仗入波唔會少。