英超周日凌晨獨腳戲，韋斯咸坐鎮主場迎戰利物浦。「錘仔幫」今季英超表現一般，條紙紮防線尤其累事頻頻失波，搞到球隊跌到降班區邊緣，作客嘅「紅軍」雖然攻力驚人，不過鬆懈嘅防守同樣遭人詬病，兩隊最近都旺大，加上雙方都有後防大將缺陣，變相畀機會兩軍前鋒發威，呢場極有機會再演入球騷，入球大值得追捧。
（Now 621台及LeSports 周日凌晨1時30分直播）
韋斯咸今季表現飄忽，講到底都係因為防守不足，領隊比歷對排出4人防線定係3中堅打法搖擺不定，搞到一班守將無所適從，上仗「錘仔幫」喺補時階段失守，畀包尾嘅水晶宮逼和2比2，就係球隊防守鬆懈嘅絕佳例證。佢哋開咧10仗聯賽狂失19球，成為英超失球第3多嘅球隊，呢場仲有主力右閘薩巴列達累積黃牌要坐波監之餘，後衞荷西方迪同森拜林都齊齊打柴，令本身令人堪憂嘅防線更加脆弱，主隊後防隨時中門大開。
韋斯咸遇前6名多波入
客軍利物浦防線雖然同樣不穩，不過表現備受批評嘅後衞洛夫雲因傷倦勤，意味領隊高普有機會調整人腳，「紅軍」上仗聯賽輕取哈特斯菲爾德3比0，啱啱喺歐聯再以同樣比數取勝，可見球隊攻力依然強勁，呢場造訪近7次聯賽面對Big 6有6次都開3球或以上嘅「錘仔幫」，佢哋絕對有機會趁機打落水狗大炒對手，將帥位不穩嘅韋斯咸領隊比歷進一步推向被炒嘅深淵，入球大係不二之選。