擺脫「2奶命」盡地一煲
日聯盃今午爆發王者戰，大阪櫻花於中立場埼玉體育場惡鬥川崎前鋒。兩支「2奶命」球隊欲打破頂級賽事冠軍荒，尤其係前鋒喺聯賽及其他盃賽接連受挫後，以隊長小林悠為首嘅鋒線，必火力全開盡地一煲，咁啱櫻花箭頭杉本健勇亦弗爆，中位數2.5球嘅1.72倍大盤必捧！
（有線61及201台周六中午12時05分直播）
雙方堪稱「2奶命」球隊，櫻花今季踏入球隊成立60周年，從未染指過任何錦標，喺2001及03年殺入日皇盃決賽都功虧一簣，今次首度進身日聯盃決賽，爭勝心唔使懷疑；另邊廂川崎前鋒喺頂級賽事亦經常做「2奶」，單係日職就3次屈居亞軍，佢哋今季本應有力問鼎3冠王，可惜近兩仗鬥柏雷素爾先後失利，除喺日皇盃輸1粒被淘汰，上仗聯賽亦只能和2比2，現時聯賽落後鹿島鹿角4分，日聯盃已屬佢哋捧盃最大希望。
前鋒往績好 奪冠秤先啲
今戰焦點落喺兩隊「神鋒對決」，川崎前鋒隊長小林悠近況勇銳，近4仗入4粒，偏偏櫻花新進射手杉本健勇腳風亦順，兩位咁啱喺聯賽同入19粒，今仗同場鬥射術，入波邊會少！睇番雙方近6次對賽，合共炮製咗29個士哥，當中5次開3球或以上，2.5球嘅大盤乃不二之選。留意番前鋒喺上述6次對賽贏咗4次，包括最近1次於9月尾以5比1擊潰櫻花，冠軍值得睇好前鋒。