國際賽前夕，球會賽事以二線波為主，其中法乙勒哈弗爾主場對蘭斯值得留意。榜首蘭斯今季表現大勇，近7場聯賽更加贏咗6場，照呢個走勢推斷，好大機會下季重返法甲。至於勒哈弗爾雖然主場不敗，但防守欠佳，遇上士氣高昂嘅蘭斯，恐怕招架唔住，平手盤一於捧蘭斯。
（周二凌晨3時45分開賽）
蘭斯喺2015/16年球季護級失敗降班，上季踢法乙表現亦麻麻。看守教練古安今季坐正帥位後，可以專心工作，果然交出好成績，開季一度取得聯賽4連勝，雖然之後連輸兩場，但好快又重回正軌近7仗6勝，狀態處於巔峰，今場作客都未驚過。反觀勒哈弗爾水準飄忽，近9場聯賽取得3勝2和4負，近5場更加失咗8球，面對「一哥」蘭斯，真係危危乎。
舊生作客腳軟捧對家
阿甲方面，沙蘭迪兵工廠主場對堤格雷，沙蘭迪兵工廠主場3連敗兼冇波入，對家堤格雷今季就仲未贏過，雙方水鬥水寧揀入球細。另一場帕托拿圖主場對紐維爾舊生，舊生今季作客3戰全敗而且冇波入，平手盤博帕托拿圖比較穩陣。