由於曼聯上屆勇奪歐霸冠軍，獲得今屆歐聯入場券，連同前4嘅車路士、熱刺、曼城及利物浦於歐聯角逐，加上阿仙奴同愛華頓出戰歐霸，共有7支英超球隊征戰歐洲賽。經過4輪之後，除咗愛華頓宣布出局外，其餘各隊都大有機會晉級淘汰賽，曼城、熱刺及阿仙奴更提早鎖定出線，認真威水。
英超球隊於今屆勢頭強勁，能否一掃近年歐洲賽頹風呢？自從2012年車仔戲劇性擊敗拜仁封王後，再未有英超兵成功染指歐聯，或許要視乎冬季轉會窗「進補」情況；但筆者覺得前景樂觀，單睇曼城多線作戰仍然霸氣外露，熱刺兩鬥衞冕嘅皇馬1贏1和，尤其係周中喺溫布萊贏「銀河艦隊」3比1極具說服力。曼聯在經驗豐富嘅主帥莫連奴帶領下穩打穩紮，只有車仔受制於板櫈深度不足令表現跌Watt，而阿仙奴亦想跟足曼聯上屆藉捧歐霸獲歐聯參賽資格條路，令英超兵聲威振歐陸。
阿仙奴聽晚難頂曼城
言歸正傳，講番英超賽事，雖然今晚戲碼一般，但周日則連場好戲，幾支參與歐洲賽球隊回歸國土困獸鬥，先有曼城惡鬥阿仙奴。「藍月亮」現時勢不可當，阿仙奴實在難攖其鋒，至於壓軸戰之一車路士火併曼聯，可謂旗鼓相當，始終一場比賽變數太多，例如有球員被逐或失準、球證誤判等因素，所以呢場不宜賭博，睇波算數。當然筆者季初已經講過，今季聯賽冠軍得主好大可能重歸曼徹斯特市，如果其中一隊係大家嘅心水，不妨早早買定邊隊攞冠軍。
金句：英超六大聲威振歐陸，周日回歸國土困獸鬥