甘巴爾新官上任三把火
周一澳職獨腳戲，西悉尼流浪者將會作客硬撼墨爾本勝利。今季開咧4仗一勝難求嘅墨爾本勝利，表現同上季判若兩隊，今場主力前鋒貝利沙停賽之餘，球隊多位主力都要離隊踢「太公波」，面對有新帥甘巴爾強勢加盟兼開咧未輸過波嘅西悉尼流浪者，墨爾本勝利有主場之利都靠唔住，平手盤當然捧作客嘅流浪者。
（有線64、203及無綫 myTV SUPER 303台周一下午4時50分直播）
西悉尼流浪者啱啱易帥，由甘巴爾接掌球隊，相信一班香港球迷對呢位西班牙籍教頭一定唔會陌生，皆因佢曾經執教過香港班霸傑志。此前執教過澳職阿德萊德聯嘅甘巴爾，近年一直喺澳洲U23代表隊做教練兼國家隊一隊助教，呢次執教西悉尼流浪者強勢回歸，肯定希望用進攻足球再次征服澳職，加上陣中有多位西班牙實力外援，尤其係今季已經入咗3球嘅射手奧利奧爾尼亞拿，依家有同聲同氣嘅甘巴爾帶住，有望進一步激發佢哋嘅超班表現，呢場仲有特威迪傷愈復出，絕對有力擊敗主隊。
墨爾本勝利殘陣未贏過
墨爾本勝利踢到第5輪聯賽，最渴望仍然係一場勝仗，不過今場佢哋未必如願以償，皆因陣中多位主力缺陣，包括中場杜羅奧斯同前鋒巴巴路西斯，都被各自國家隊徵召出戰世界盃外圍賽附加賽，加上當家射手貝利沙前一仗粗暴對待第四旁證要坐波監，今場勝利絕對係無頭一啤蛇，主隊勝算凍過水，平手盤必捧客勝。