澳職榜首戰主隊受讓筍
澳職開季啱啱滿月，話咁快今日就上演1、2哥對決，由榜首嘅墨爾本城主場擺擂台迎戰第2位嘅FC悉尼，今季墨城季初狀態非常理想，反而FC悉尼表現就反覆啲，整體比賽狀態唔及主隊，加上呢場作客，睇嚟不宜高估喎，作客讓波，寧取受讓嘅墨爾本城讓球主勝。
（有線64及203台周五下午4時50分直播）
墨城上季後防失波嚴重，今季針對問題特別挖走阿德萊德聯嘅中堅拿洛卡，原本喺荷甲搵食嘅中堅舒恩基維特亦遠道加盟，呢對全新嘅中路防守組合果然收效，今季頭4場聯賽只失1球。
陣容往績都有優勢
中前場位置由於前鋒科拿路利受重創，於是動用替補名額，球隊由英冠收購嘅前鋒羅斯麥哥馬克，近期從直播所見，呢位箭頭把握能力強，射罰球更加係有板有眼，由佢配合後上中場史提芬莫克同右中場布魯士卡馬奧，火力強勁，呢個陣容可謂冠絕澳職。墨城近3次主場對FC悉尼攞到2勝1和不敗，再加上今日主場出擊，我對受讓嘅讓球主勝極有信心。
反觀FC悉尼雖然依家排第2，但今季季初表現有啲回落，近年佢哋一向以穩健防守見稱，但從季初失球數字真係麻麻哋。阿歷斯韋堅遜同佐迪布積斯於中路防守多次失誤，教頭阿諾特當然不滿啦，前場老將保斯基今季表現更係嚴重下滑添，攻守都出現問題，今場捧唔過。