樂比主力研究「車曼戰」，曼聯領隊莫連奴向來穩陣，核心思想從冇變過，對強隊以唔輸為大前題，對住舊東家車路士梗係用番擅長嘅「泊大巴」戰術，曼聯受讓平半1.8倍下盤值捧！
（Now 621及LeSports周一凌晨零時30分直播）
遇強守住先 唔輸為原則
曼聯今季其實踢法進取咗，10場聯賽入23球，遠勝上季同期，不過當對住強隊，「寸王」就穩字行先，好似上月作客利物浦，當時曼聯6連勝氣勢正盛，但依然集中防務，最終如願和0比0，「寸王」眼中強強對撼屬6分波，最緊要唔輸，正所謂行走江湖最忌心浮氣躁，莫帥無論教邊隊波方針冇變過。莫帥近8次領軍鬥英超衞冕球隊錄得3勝5和不敗，印證之前所講嗰套足球哲學，加上莫連奴多次向干地出口術，搞到干地躁躁哋，可謂未踢先贏心理戰。
衞冕嘅車路士已開始脫離爭標視線之外，單見冠軍賠率有成18倍就知咩事。車仔衰在後備兵源嚴重不足，喺兩線作戰加傷兵纏繞下，踢來踢去都係嗰16、7個球員，點會有好表現，唯一好消息係防中尼高路簡迪有機會傷愈復出，不過車仔班攻擊球員選擇乏善足陳，艾華路莫拉達經過季初蜜月期後，已連續6場交白卷，似乎承受唔到要孭飛嘅壓力，作為佢替補嘅巴舒亞伊就更加未夠班喺大球會擔正，車仔冇足夠彈藥擊敗曼聯，今場要贏波唔易。