德國盃第2圈今晚上演矚目大戰，上季異軍突起嘅嘅「小富豪」RB萊比錫主場挑戰班霸拜仁慕尼黑，萊比錫近況當銳心都雄埋，今晚決心蓄銳打老虎，遇上已撥亂反正嘅拜仁會係一場對攻好戲，黑柴推介有2.25倍嘅中位數3.5球大盤。（無綫myTV SUPER 94周四凌晨2時45分直播）
萊比錫反擊遇強愈強
RB萊比錫上季初升德甲已經一鳴驚人，勇奪聯賽亞軍直接進身今屆歐聯分組賽，上周中喺主場3比2力克葡超勁旅波圖，贏得球會史上首場歐戰勝利。萊比錫雖然仲係德甲新丁，但有豐厚財政支持，而且處心積慮準備喺德甲同歐洲賽場揚威已有多年，攞到好成績並唔意外。佢哋近期喺各項賽事4連勝狀態一流，前一輪聯賽更半力出擊，作客爆冷贏3比2終止另一勁旅多蒙特連續41場主場不敗紀錄，足見呢班波嘅快速反擊遇強愈強。萊比錫上輪聯賽對史特加嘅下半場，先後將迪姆華拿、拿比基達同科斯貝治3大主力提早換走，擺明留力蓄銳迎接今仗，萊比錫上季兩遇拜仁都輸，今晚夫添主場出擊，有充足決心向高難度挑戰，誓同拜仁駁火。
拜仁得老帥軒歷基斯重投即重返正軌，連贏3場正式賽事並保持不失，軒帥向來重視德國盃，佢對上帶領拜仁嘅兩個球季，都能夠殺入德國盃決賽，上輪聯賽對漢堡亦作出適量輪換同留力，對今場大戰做足準備，雖然列貝利同湯馬士梅拿因傷缺陣，但前線陣容仍然足夠豪華，暫代隊長洛賓同近期腳風麻麻嘅羅拔利雲度夫斯基都對入波極度飢渴，遇近期後防鬆散嘅萊比錫肯定會有足夠空間畀佢哋爭取士哥。不過，門神紐亞嘅缺陣同一貫主攻踢法，亦同樣給予萊比錫更多反擊機會。
拜仁上季作客贏5比4
拜仁上季雙殺萊比錫過程精彩，作客一役雙方更合力炮製5比4瘋狂入球騷，雖然兩軍3日後會喺聯賽再次碰頭，但面對今晚呢場淘汰賽都冇錫身理由，一於博佢哋大騷Encore！