西流未執掂冇阿聯符

人腳大變 教頭反應慢
今日下晝澳洲足總盃將會上演埋另一場4強戰，由西悉尼流浪者主場迎戰阿德萊德聯。究竟兩隊澳職邊隊會同已經入咗決賽嘅FC悉尼爭標？「西流」同「阿聯」依家喺聯賽成績都係三戰不敗，但考慮到球員鬥志同教頭即場調動能力，我會選擇信阿德萊德聯。
（有線64及203台周二下午4時30分直播）
「西流」今季領導層、以至陣容都有好大變化，近年最成功嘅主帥普波域離隊，後防正選沙朗高爾、史葛尼維利、中場尼高斯同埋好波之人尼高拉斯馬天尼斯同球會講再見。雖然話有貝迪斯箭頭艾華路施祖度，以及左閘魯爾洛蘭迪加入，只可惜兩位新加盟嘅西班牙外援已經年過30，明顯地近3場比賽都出現尾段體力不繼問題。上場打吡對住FC悉尼，就更加係領先2球下被逼和，3場波失咗5球，要注意吓防務喇。再者，暫代領隊霍斯領軍經驗不足，臨場反應緩慢，一旦踢起重要比賽，難免蝕底啲。
阿德萊德聯韌力十足
至於阿德萊德聯今季後勁同鬥志都十足，連續3場都係先落後下追平或者反勝，夠晒韌力。今季前鋒線重用新加盟嘅丹麥外援阿比沙路臣，呢位左腳重炮場場都有料到，加上新任教練馬高告斯臨場調兵遣將能力唔錯，每次去到下半場嘅調動都有效率，特別印象深刻係前一個禮拜聯賽作客布里斯班獅吼，去到下半場84分鐘，馬高告斯撳掣出右翼賴恩基圖，4分鐘後佢就有波入，加埋阿比沙路臣補時中龍，球賽尾段連入兩球反勝。「阿聯」自今年八月起，場場都有波入，顯見攻力唔曳啦，今場作客下受讓，可以一信喎！