今晚英超至激重頭戲，當然係早場「雙紅會」利物浦主場火併死敵曼聯，每逢呢類大戰上演，總有一些名宿喺開波前會出來幫愛隊出口術，先打心理戰影響敵方嘅部署。
利物浦名宿「國王」杜格利殊深明舊東家落後曼聯7分，必須藉「雙紅會」贏波收窄積分距離，賽前特登使用激將法，認為堂堂「2哥」曼聯造訪晏菲路球場一定泊大巴，甚至係擺幾架雙層巴士，希望激嬲曼聯主帥「寸王」莫連奴主動進攻，咁樣會有利紅軍打最擅長嘅快速反擊，但筆者覺得「寸王」一向贏波大過天，完全唔會介意打穩守突擊，預計杜格利殊呢招心理戰未必得逞。除此之外，賽前謠言有利記高層眼見菲臘比古天奴心繫巴塞，若巴塞季中能出價1.2億鎊的話，亦會考慮放佢走，到底係乜嘢葫蘆賣乜嘢藥呢？真係佢哋行內人先知。
雖然紅魔今季弗到漏油，但「雙紅會」利記往往都打甩髀，所以邊隊會贏波好難講，視乎佢哋嘅臨場發揮。因此筆者唔會喺賽前作出推介，並奉勸大家先睇睇兩軍嘅正選陣容，毋須賽前盲舂舂買定，開波後再觀察比賽形勢再玩「走地」都未遲，如果真係等唔切想買定的話，頂盡小敲0:1及1:1波膽，大注則臨場睇形勢再決定吧。
金句：今夜雙紅會利記名宿，幫出口術戲紅魔寸王。