國際賽後英超上演「雙紅會」超強戲碼，紅軍利物浦主場迎戰紅魔鬼曼聯，曼聯今季氣勢一時無兩，火力全開兼防線堅固，好難同佢哋作對，反觀利物浦痛失福將沙迪奧文尼，平手盤捧曼聯坐和望贏。
（now 622及 LeSports周六晚7時30分直播）
利物浦近期諸事不順，雖然好多人話阿歷士張伯倫係正宗黑腳，自佢由阿仙奴加盟後紅軍僅一勝，更被球迷冠以「張九齡」稱號（連續2仗為不同球隊效力吞9蛋），但樂比唔認為張伯倫有咁大影響力，反而喺世界盃外圍賽受傷嘅沙迪奧文尼今仗倦勤影響更大，事關文尼加盟以來，缺陣期間利物浦僅得4成勝率，相反佢在陣勝率卻有6成，況且文尼在陣利物浦平均入球高達2.3球，比佢唔喺度時嘅1.3球足足多一球，可見其重要性！
古天奴法明奴飛到冇氣抖
紅軍另一隱憂係兩名巴西外援菲臘比古天奴及羅拔圖法明奴都遊完飛機河，雖然話曼聯都有大量國腳踢完國際賽，但無可否認南美洲路程遙遠，影響係比較大，加上利物浦後備兵源冇曼聯咁充足，兩名主力今仗多數要頂硬上，未知會否影響發揮。
不過利物浦最得人驚始終係防線，7場聯賽失咗12球之多，全英超僅得水晶宮同韋斯咸多過佢哋，以一隊勁旅標準嚟睇係唔可以接受，防線無論係門將米洛列特，後衞洛夫雲、卡拉雲及艾拔圖摩蘭奴等人，質素都相當平庸，更遑論要擔大旗，除非華基爾雲迪積克真係明年一月來投，否則防線都難望有改善，今仗面對弗爆嘅盧卡古，真係只能自求多福。
曼聯上季與利物浦兩度交手均打和，其中作客晏菲路一仗，控球率僅得35%，係有紀錄以來曼聯單場控球指數最低嘅一場，不過時移勢易，曼聯今季可以話順風順水，除咗一改以往沉悶風格，火力更異常強大，除盧卡古外，拉舒福特、安東尼馬迪爾等都相當生猛，平均每場聯賽入球高達3球，兩隊氣勢一強一弱，今場梗係跟紅頂白啦！