所向披靡嘅法甲土豪巴黎聖日耳門（PSG），唔單止想重奪法甲盟主寶座，更大嘅野心係稱霸歐聯，佢哋喺B組頭兩場全勝，包括豪贈德國拜仁3蛋，盡顯霸氣，今晚PSG造訪比利時球隊安德列治，相信過3關（3連勝）難度唔大。
（有線62及202台周四凌晨2時45分直播）
筆者嘅着眼點，反而係邊隊會取得首名出線，畢竟拜仁於今輪及下輪皆鬥實力一般嘅些路迪，兩仗全勝擸晒6分一啲都唔奇，因此PSG呢兩輪面對低幾班嘅安德列治亦不能留手，先可以繼續壓住拜仁3分，待雙方喺尾輪再正面交鋒時，PSG隨時和波都夠首名出線。要知道取得首名後，喺16強淘汰賽會出戰其他組別嘅次名，爭標路途上絕對有着數。天價來投嘅尼馬，喺PSG終於可以做「1哥」，仲有超新星基利安麥巴比，睇佢踢波係一種享受，呢班波對冠軍充滿飢渴感，值得期待。
馬體會反「克」非勝不可
至於早場有C組馬德里體育會中立場鬥阿塞拜疆弱旅卡拉巴克（有線61及201台周四凌晨零時直播），「床單兵團」頭兩輪僅得1和1負未贏過，若果今仗對住卡拉巴克都贏唔到的話，出局危機更大，可以話係非勝不可，不妨以呢場加埋PSG嗰場，玩條0比3及0比2嘅波膽過關2串3，中咗都幾和味。
金句：PSG過3關無難度，馬體作客拜疆唔贏唔得。