今晚爆發世盃外圍賽歐洲區附加賽首回合，最矚目之戰梗係「格仔兵團」克羅地亞主場火併希臘。克羅地亞雖然中場粒粒皆星，可惜鋒線把握力曳到冇朋友，搞到淪落到要踢附加賽，撞正有主力中堅文奴拿斯停賽、以「鐵壁」應戰嘅希臘，步步為營之下唔慌多波入，一於捧中位數2.5球嘅入球細。
（有線61及201台周五凌晨3時45分直播）
早前經歷易帥風波嘅克羅地亞，雖然坐擁莫迪歷、拿傑迪錫、比列錫、波索域等中場好手，可惜前鋒老將文迪蘇傑逐漸跌Watt，其他接班人又冇料到，好似卡拉馬歷咁又時好時壞，導致入球率大為下降，「格仔兵團」喺近8仗世盃外，入得8粒咁大把，全部開2球或以下，成為佢哋淪為I組次席要踢附加賽嘅主因。
附加賽首回合先求不失
另一邊廂，希臘不嬲守強攻弱，在今屆世盃外僅失6球，不過主力中堅文奴拿斯在尾2一輪世盃外對塞浦路斯，特登拖延時間而攞黃牌，令佢累積夠數於尾輪對直布羅陀停賽，擺明係想「洗牌」以便於附加賽披甲，點知奸計未能得逞，畀國際足協罸佢今仗坐多1場監，希臘勢必進一步加強防守。加上今仗只係首回合，雙方唔想有乜閃失，鬥穩陣唔慌多波入，細盤乃不二之選。