今日下午澳職阿德萊德聯喺主場迎戰紐卡素噴射機。噴射機開咧令人眼前一亮，至今保不敗之餘仲穩坐積分榜第3位，客戰尤其有料到，近2仗作客全勝；相反主隊「阿聯」近3仗聯賽只攞得1分，今場仲要讓平半，梗係捧番紐卡素噴射機嘅1.87倍下盤好過啦！
（無綫myTV SUPER 303周六下午2時35分直播）
上季聯賽慘淡包尾嘅紐卡素噴射機，今季季初擺脫頹勢，開咧5輪不敗取得3勝2和成績，表現突飛猛進。噴射機堪稱係澳職今季最賞心悅目嘅球隊，至今已經攻入13球，屬聯賽入波最多一隊。火力咁強勁，都係要多得季前新加盟嘅前鋒奧當路雲，呢位愛爾蘭射手頭5輪聯賽個人狂轟7球，表現弗到漏油，上輪聯賽仲梅開二度幫球隊3比0輕取威靈頓鳳凰，真係入波入唔停，今場肯定會對主隊「阿聯」防線造成唔少麻煩。
阿德萊德聯頹勢兼殘陣
阿德萊德聯方面，球隊近3仗聯賽不勝之餘，仲輸咗兩場，球隊急需一場勝仗止瀉，不過形勢並唔樂觀，皆因球隊傷兵問題嚴重，除丹麥翼鋒阿比沙路臣同土耳其後衞古路姆仲需要養傷之外，阿爾及利亞中場核心馬莫亞上仗亦因傷被換離場，今日上陣成疑。一班有質素嘅外援都未必出得，球隊實力肯定受影響，好難頂得住近況大勇嘅噴射機攻勢，試問點會有本錢讓球，下盤值捧。