世界盃外圍賽歐洲區附加賽生死戰，丹麥今晚首回合先喺主場出擊，迎戰踢法好硬淨嘅愛爾蘭。丹麥球員偏向技術型踢法，遇上體力化嘅愛爾蘭經常被剋住，何況丹麥目前受傷兵問題困擾，贏波難度極大，愛爾蘭有力保持不敗，作客受讓半一必捧下盤。
（有線61及201台周日凌晨3時45分直播）
丹麥防線傷兵滿營
丹麥目前傷兵問題嚴重，尤其防線多位主力帶傷，效力貝迪斯嘅正選左閘列沙杜美斯因傷未有入選，正選右閘達斯加特亦喺賽前受傷退隊，兩隻閘換晒將成最大隱憂。另外2位守將卡積亞同比蘭特都喺上仗聯賽受傷，雖然話有機會趕及傷愈披甲，但狀態肯定會打折扣。
愛爾蘭對賽2連勝
無可否認，擁有基斯甸艾歷臣、尼高拉佐真遜等好波之人嘅丹麥，平均技術係高過愛爾蘭，不過愛爾蘭陣中就有大量「打仔格」球員，好似哈利艾達、格連韋倫同沙恩朗等都係出晒名爛打，體力化踢法正正可以剋制丹麥技術型踢法，2軍過去2次交鋒，均由愛爾蘭獲勝。
愛爾蘭喺世盃外10場分組賽只輸過1次，當中5仗作客比賽更加拎到3勝2和不敗成績，可見佢哋作客所採取嘅硬朗防守踢法相當有效，領隊奧尼爾同助教堅尼都係大賽經驗豐富，愛爾蘭今仗作客求不敗應該唔難，下盤穩陣！