聽朝早上爆發世盃外圍賽洲際附加賽首回合，中北美洲「4哥」洪都拉斯主場硬撼亞洲代表澳洲。澳洲仍要靠老將卡希爾數胡，但佢有傷在身未必擔正，客場出擊勢必小心為上，留待次回合返主場先見真章，面對實力一般嘅洪都拉斯唔慌多波入，捧2.5球細盤最穩陣。
（周六早上6時開賽）
36歲老將隨時留力次回合
澳洲於上圈亞洲區附加賽，憑老將卡希爾梅開二度，幾經辛苦才兩回合至加時以3:2淘汰敘利亞，不過卡希爾已經36歲，而且佢之前於聯賽整親足踝要退下火線，雖無大礙歸隊兼且話可以出得，甚至帶定一部製冰機，喺飛去洪都拉斯嗰15個鐘「飛機河」中，用嗰部機配合軍醫敷冰治療傷勢，但未必能正選披甲，隨時效法對敘利亞時首回合先任後備，次回合返主場才擔正。不過「袋鼠國」仍很倚賴這位老將數胡，若果佢唔出得會令火力大減。加上「袋鼠國」近6仗法定時間5次開2球或以下，造訪近8仗世盃外僅2勝嘅洪都拉斯，必定穩陣行先，留番次回合返主場先採取主動，難有大手交易。