意軍昏瑞細難翻身
世界盃外圍賽歐洲區附加賽，首回合以1球落後嘅意大利，周二凌晨將會返到主場背水一戰再鬥瑞典，不過意大利上仗踢法雜亂無章，全場毫無優勢之餘，中前場仲嚴重斷纜，搞到一班前鋒喺前線冇啖好食，瑞典有1球在手，呢場作客肯定擺定大巴招呼意軍，意大利雖然話要焗攻反勝，但係邊有齋講咁簡單，呢場兩隊睇怕難有大手交易，捧2.5球入球細。
（有線61及201台周二凌晨3時45分直播）
意大利首回合落後命懸一線，世界盃晉級形勢絕對唔樂觀，上仗表現堪稱慘淡嘅藍衫軍，其實早在小組賽作客淨吞西班牙3蛋之後，就引起傳媒和球迷不滿，領隊雲杜拿首當其衝孭晒鑊，遭批評話佢係意大利國家隊史上最渣教頭，箇中原因同佢頻頻換陣不無關係，搞到一班球員無所適從，上仗3-5-2陣式證明冇料到，嚟緊好大機會又要再轉，皆因中場大將馬高華拉堤累積黃牌次回合要停賽，對本來運作唔算順暢嘅中場嚟講真係雪上加霜，加上上仗啱啱傷愈就頂硬上嘅比洛迪表現一般，聯賽當弗嘅施蒙尼沙薩又未好番，前場冇人入到波，呢場試問又點樣取勝？
瑞典爛頭卒勝在肯砌
踢法硬朗嘅瑞典雖然人腳同實力唔算標青，不過勝在肯搏鬥志盛，尤其係一班前場球員，好似喺西亞揾食嘅馬古斯貝治，同埋喺法甲圖盧茲連正選都冇嘅托禾倫，上仗就逼到一班經驗老到嘅意大利後防出錯失波，就連喺英超面對哈特斯菲爾德都騰晒雞嘅瑞典後衞域陀連迪路夫，上場對住意大利都毫不怯場，表現穩健生性番，呢場面對一班冇貨交嘅意大利前鋒冇有怕，兩軍前鋒都難有作為，今場入波又點會多吖？