防線殘缺以攻代守
今日下午澳職獨腳戲，中岸水手主場對阿德萊德聯。兩隊今仗同樣有多位防守主力缺陣，隨時益咗班前鋒揾食，兩軍近3季8次對碰全部開大，呢場有望再嚟鬥攻，中位數2.5球嘅入球大有1.6倍捧得過！
（有線64、203台及無綫myTV SUPER 302周四下午4時50分直播）
開咧連續5場不勝嘅中岸水手，中堅史唐路斯剛為新西蘭踢完世盃外圍賽附加賽對秘魯嘅兩回合賽事，今場未必有力再為球隊搏殺需要休養，另外仲有西班牙中堅阿倫巴路要停賽，兩位後防中流砥柱齊齊冇得踢，防線實力肯定大打折扣。不過球隊上仗大踢爭氣波，主場2比0爆冷擊敗前列球隊FC悉尼，終於成功開齋，經此一役班進攻球員信心返晒嚟，加上今日主場出擊，相信會以攻代守踢得進取啲。
近8交鋒每場至少入3粒
作客嘅阿德萊德聯近況麻麻，近4仗聯賽1和3負，今仗防線同樣天殘地缺，3位守將泰歷艾列治、泰萊列根及古路姆皆因傷倦勤，一味齋靠防守相信唔頂得幾耐，佢哋今季聯賽作客3仗有兩場入到波，踢法唔算保守。翻查往績，兩軍近8次對賽全開3球或以上，今場睇形勢入波都唔會少，向大盤埋手係最佳選擇。