封王在即睇定食
話咁快今季巴甲已經轉彎入直路，聽朝有「1哥」哥連泰斯主場對富明尼斯。哥連泰斯已甩開列強幾條街，隨時大踢穩陣波，撞正作客曳兼傷兵滿營嘅富明尼斯，未必多波入，捧1.75倍嘅2.5球細盤最划算。
（周四早上7時45分開賽，馬會網上文字直播）
哥連泰斯今季喺聯賽順風順水，暫領先次席甘美奧10分，計埋今輪得番4輪，當然哥軍今仗只要贏波，就唔使理甘美奧主場對聖保羅嘅賽果，即可提早3輪奪冠。
富明尼斯傷兵多惡唔出樣
哥連泰斯都唔係無隱憂，陣中首席射手祖奧腳風欠順，近7仗聯賽入得兩粒，無論甘美奧今輪贏定輸，哥軍好大機會先求穩陣。另邊廂位列中下游嘅富明尼斯，近6仗聯賽作客僅1勝，仲輸咗4場，加上仍有馬高斯祖利亞、比亞爾及雷斯費蘭度等傷兵作客惡唔出樣。睇番雙方近7次交手，全開2球或以下，不妨追細盤。