決賽周最後兩席
歷時超過兩年半嘅2018年世盃外圍賽，踢埋聽朝正式落幕，經過今日凌晨愛爾蘭對丹麥嘅歐洲區附加賽後，決賽周32支球隊已經誕生30支，最後兩張入場劵將由澳洲對洪都拉斯、及秘魯鬥新西蘭嘅洲際附加賽決出，咁蹺兩場首回合都係0比0，令次回合成為名副其實生死戰，邊兩隊能趕上俄羅斯嘅尾班車？大家拭目以待！
附加賽經驗贏晒
澳洲主場爆洪都拉斯
澳洲今午喺附加賽次回合返主場再鬥洪都拉斯，「袋鼠兵團」作為洲際附加賽嘅「常客」，呢啲生死時刻早已見慣見熟，加上佢哋喺地頭作賽已經21場不敗，主場咁旺，冇理由唔捧1.53倍主勝！
（Now 670及Fox Sport Play周三下午5時直播）
先講吓歷史，2001年韓日世盃外洲際附加賽，首回合主場帶住1比0優勢嘅澳洲，次回合作客淨吞對手烏拉圭3蛋，慘遭淘汰；4年後德國世盃外圍賽，澳洲捲土重來，再次同烏拉圭喺洲際附加賽相逢，不過今次「袋鼠軍團」同對手搏到盡，最終澳洲喺主場憑互射12碼勝出打入決賽周，相信唔少球迷都記得艾萊斯最後射入致勝球，帶領澳洲歷史性首闖決賽周嘅一刻。
卡希爾復出添士氣
某種意義上，洲際附加賽成就咗澳洲足球嘅崛起，雖然當年奮戰嘅大部分球員都已退役，不過卡希爾依然屹立不倒，呢位「袋鼠拳王」前仗替澳洲梅開二度淘汰敍利亞，事隔多年再打入洲際附加賽，卡希爾亦傷愈候命，有佢在陣澳洲信心自然爆棚，有望再次喺主場球迷面前贏波出線。
對手洪都拉斯賽前大玩心理戰，詐型話澳洲出動無人機刺探軍情，擺明係心虛表現，皆因球隊多位主力有傷缺陣，包括主力門將艾斯哥巴同前鋒艾迪靴南迪斯，呢場仲要作客，體力上肯定輸蝕，面對主場強勢嘅澳洲毫無優勢可言，捧主勝屬明智之選。